दरभंगा मे आब बच्चा सभसँ पहिने प्रधानाध्यापक चखताह मध्याह्न भोजन, मिड-डे मील पर शिक्षा विभागक नव आदेश

मिथिलानी न्यूज डेस्क | दरभंगा

सरकारी विद्यालयमे बच्चासभकेँ देल जायवला मध्याह्न भोजनक गुणवत्ता सुनिश्चित करबाक लेल शिक्षा विभाग सख्त निर्देश जारी कयने अछि। आब बच्चासभकेँ भोजन परसबाक पहिने विद्यालयक प्रधानाध्यापक अथवा हुनका द्वारा नामित शिक्षककेँ स्वयं भोजन चखय पड़तनि। भोजनक गुणवत्ता नीक आ बच्चासभक खयबाक योग्य होयबाक लिखित प्रमाणपत्र देब सेहो अनिवार्य कयल गेल अछि।

मध्याह्न भोजन योजना निदेशालयक निदेशक विनायक मिश्र एहि संबंधमे जिला शिक्षा पदाधिकारी (DEO) आ मध्याह्न भोजन योजना के जिला कार्यक्रम पदाधिकारी (MDM DPO) केँ निर्देश जारी कयने छथि।

निर्देशमे कहल गेल अछि जे एहन सूचना भेटि रहल अछि जे केंद्रीयकृत रसोईघर अथवा विद्यालय शिक्षा समितिक माध्यमसँ सरकारी आ सरकारी सहायता प्राप्त विद्यालयमे बच्चासभकेँ कम गुणवत्ता वाला भोजन देल जा रहल अछि। एहि शिकायतकेँ ध्यानमे रखैत भोजनक गुणवत्ता सुनिश्चित करबाक लेल ई व्यवस्था लागू कयल गेल अछि।

भोजन परसबाक पहिने चखय पड़त खाना

जारी निर्देशक अनुसार, प्रत्येक विद्यालयमे प्रतिदिन बच्चासभकेँ भोजन परसबाक पहिने प्रधानाध्यापक, प्रभारी प्रधानाध्यापक, प्रधान शिक्षक अथवा प्रभारी प्रधान शिक्षककेँ स्वयं भोजन चखय पड़तनि।

जँ ई सभ उपस्थित नहि रहताह, तँ हुनका द्वारा नामित शिक्षक एहि जिम्मेदारीकेँ पूरा करताह।

भोजन चखलाक बाद ओकर गुणवत्ता संबंधी प्रमाणपत्र लिखब अनिवार्य होयत। एहि प्रमाणपत्रकेँ विद्यालयक अभिलेखमे सुरक्षित राखय पड़त।

गुणवत्ता प्रमाणपत्रक प्रारूप सेहो तय

मध्याह्न भोजन योजना निदेशालय भोजनक गुणवत्ता प्रमाणित करबाक लेल एकटा प्रारूप सेहो निर्धारित कयने अछि। एहि प्रमाणपत्रमे लिखल रहत—

“हम भोजन स्वयं ग्रहण कयलहुँ आ भोजनक गुणवत्ता नीक अछि। हम प्रमाणित करैत छी जे ई भोजन बच्चासभक खयबाक योग्य अछि।”

एहि प्रमाणपत्र पर प्रधानाध्यापक, प्रभारी प्रधानाध्यापक, प्रधान शिक्षक अथवा प्रभारी प्रधान शिक्षकक हस्ताक्षर रहतनि।

निर्देश पर सख्ती सँ अमल करबाक आदेश

मध्याह्न भोजन योजना निदेशालय जिला कार्यक्रम पदाधिकारी (MDM DPO) केँ एहि निर्देश पर सख्ती सँ अमल करयबाक आदेश देने अछि।

एहि व्यवस्थाक मुख्य उद्देश्य सरकारी आ सरकारी सहायता प्राप्त विद्यालयमे बच्चासभकेँ परसल जायवला मध्याह्न भोजनक गुणवत्ता सुनिश्चित करब आ खराब भोजन परोसबाक शिकायत पर रोक लगेनाइ अछि।

विद्यालय आ शिक्षासँ जुड़ल स्थानीय खबर आ जरूरी जानकारी लेल पढ़ैत रहू मिथिलानी।