राजर्षि जनकक प्राणप्यारी दुहिता मैथिली,शक्तिक अजस्र स्रोत वैदेही,असुर-त्रास सं सज्जन लोकनिक त्राणक हेतु सीता, आसुरी शक्तिक बन्दिनी होइतहुं अपन कर्त्तव्यपथ पर अविचलित -अकम्पित ठाढ़ जनकात्मजाक स्मरण -मात्र सॅं हृदय श्रद्धा सं नत भ’ जाइत अछि। हुनक स्मरण मात्र सॅं हृदयकेॅं चहुॅं दिसि सॅं करुणा घेरै अछि,हुनक उत्पत्ति सॅं ल’ क’ भूमिसात हयबा धरिक जीवन यात्रा नोर सॅं भीजल देखना जाइछ,अथाह वेदनाक जलधि मे ऊमडूम होइत प्रश्नांकित स्त्री-अस्मिता विचलित करैत अछि, तथापि प्रतिकूलतम परिस्थितियो मे हुनकर अविचल धैर्य आ  पातिव्रत्यक आदर्श तथा निर्भीक स्वाभिमान हृदय केॅं श्रद्धावनत करैत अछि।

वैदिक काल कें छोड़ि देल जाइ,त’ स्त्रीक लेल समाज कहियो बहुत उदार नञि रहल अछि।ओकर दृष्टिकोण स्त्रीक संबंध मे निर्मम शंकाशीलताक रहल अछि,कनेको निर्धारित पथ सॅं स्खलित भेला पर, खाहे ओहि स्खलनक हेतु ओ स्वयं होथि वा क्यो आन, निठुर-निदारुण परित्याग हुनक नियति बनल छल।एखन एहि प्रसंगक करुण-ध्वनि केॅं कात राखि, सीताक व्यक्तित्वक आ चरित्रक सबल पक्ष पर दृष्टिपात करब आ एहि चिंतन लेल आधार- भूमि रहत परम आदरणीया पद्मश्री श्रीमती उषा किरण खान जी द्वारा विरचित काव्य-“जाइ सॅं पहिने”।

अपन काव्यक दिशाक निर्देशन करैत लेखिका भूमिका मे लिखैत छथिन-

“अनकर अपराधक दण्ड भोगयबाली जानकी आजिज आबि गेल छलीह करुणा विगलित दयालु प्रेम सॅं।कोन विधियें रहितथि एहि असार संसार मे? आर कतेक बेर शंकित घुरघुराइत मनक शान्ति केॅं अपन सतीत्वक परिचय रूपी चानन सॅं शीतल करितथि?”

एत’ मोन पड़ि जाइत अछि स्टीफन ज्विग(Stefan Zweig) महोदयक बिवेयर ऑफ पिटी

“Sympathy is a double edged sword. If you don’t know how to use it, don’t even touch it, and more importantly, you have to harden your heart against it.”

स्वाभिमानिनी सीता ई सहानुभूति किंवा दया स्वीकार करबा लेल तैयार नञि छथि अपात्र राजकुल सॅं !

गुरु,ऋषि वा पितृव्य वाल्मीकिक लव-कुशक प्रबोधनक क्रम मे सीताक निरपराधिताक, पवित्रताक आ चारित्रिक उन्नतिक प्रमाणपत्र सन ई उक्ति ध्यातव्य अछि-

बाउ, निरपराध मृगशाविका, भयातुर कपोती

परित्यज्या रमणीय,वर्षाक भू-लुंठित बुन्नी

मौलिश्रीक तूबल पुष्प,पिरौंछ खसल पत्र

एक्कहि होइछ सर्वत्र!

बाउ लोकनि ओ आइयो सिय सुकुमारी छथि

युगे युगे रहतीह,अहिंक माय सन निस्संदेह रहतीह।

प्रसंगवश कविक कर्म आ धर्मकेॅं निर्धारित करैत जकाॅं लेखिका कहैत छथि-

“कवि कत्तहु सॅं पात्र नहिं गढ़त

जॅं गढ़त त’ तकर प्रत्यक्ष रूपाकार होयत।”

सीताक आहत अभिमानक पीड़ा केओ नहिं बुझैत अछि, मात्र बुझैत छथि कवि,रामक प्रति एकनिष्ठ पवित्र प्रेम सेहो कविक अतिरिक्त केओ नहिं देखि पबैत छनि-

“कविक जन्म पीड़ा सॅं होयत

कविक मोन मे प्रेम रहैत अछि तलफैत

जेना जल बिनु मछरी

रेह बिनु बिजुरी

आंखि नोर बिनु

नदी कोर बिनु “

तैं एकठाम कवयित्री महर्षि वाल्मीकिक प्रति अपन कृतज्ञता ज्ञापित करैत कहैत छथि-

कविकर्महुॅं सॅं पैघ होइत अछि

मनुज- धर्मकेॅं बूझब मर्म

काव्य लिखै सॅं पैघ

 होइत अछि लोकचेतना

अहा,सिया केॅं मोन पड़ैत छनि

आशीषक ओ हाथ।।

सीताक सहनशीलता टूटि गेल छनि राजधर्मक निठुरता देखि,राजाक रूप मे स्थापित रामक आदर्शक कुत्सित कदर्यता देखि-

आब नहिं सहल जाइत अछि

आतप सॅं झुराइत जजाति

टटाइत सीत, निर्वीर्य जन

दलित दलमलित जनीजाति

ई छोड़- बाड़,ई लागि- लपटि

हाड़ हाड़ हड्डी भेल देह

कठुआयल ठेहुन

ऐंचैत डांड़,सन- पटुआ होइत केश

पिअरायल चाम,बिसरायल निन्न

ओहि सात्विको वातावरण मे पालन- पोषण पौनिहार लव-कुशक मोन मे बहुत रास प्रश्न, बहुत रास जिज्ञासा छैन जे संभवतः टूटल परिवारक शिशुक स्वाभाविक अन्तर्द्वन्द्व थिक। लेखिका सहानुभूतिपूर्वक एहि असमंजस केॅं शब्द मे रूपायित केलखिन अछि-

औनाइत रहैत छथि प्रश्नाकुल भेल लव

सुनगैत रहैत छथि कुश,हुनक तापेॅं

मद्धिम- मद्धिम।

सीता बुझैत रहैत छथि हुनक मन: स्थिति,तैंयों बुझबैत छथि-

बहुत रास प्रश्न एहन होइछ,जकर उत्तर नहिं

ढेरी खेरहा एहन छैक जकर प्रश्न नहिं बनय

अपन लक्ष्य पर ध्यान धरी

राजा राम केर गरिमा राखी।।

पुरुषक प्रेमक स्वार्थपरता आ स्त्री- प्रेमक दिव्यता व्याख्यायित होइत अछि एहि तरहेॅं-

बसल छी रन्ध्र- रन्ध्र मे अहाॅं

अहाॅंक लेल हम धनुर्विद्याक श्रेय होइक

लंकाविजयक निमित्त होइक

राजैषणा पर लोकैषणाक विजय गाथा होइक

हमरा लेल अहाॅं प्राणहरि छी-

ने साध्य न साधन।

अहाॅं साक्षात विजय थिकहुॅं

हम मुदा पराजय नहिं थिकहुॅं।

“हम मुदा पराजय नहिं थिकहुॅं” ई वाक्य स्त्रीक सबल अस्मिताक आख्यान थिक जे सभ स्त्रिगण लेल आइयो उपादेय अछि।समर्पणक अर्थ अपन अस्तित्वक विलयन नहिं, परिवार बचयबाक लेल दैन्यक स्वीकृति नहिं।

लंकाविजयक उपरांत सीता- रामक प्रथम भेंटक क्षण रामक उक्ति निष्ठुरताक पराकाष्ठा थिक-

सीता हम अहाॅंक लेल नहि कएलहुॅं

युद्ध

रावण केॅं करक परास्त

देवसत्ता केॅं स्थापित करक

पत्नी जनिकर हरण भेल

ताहि राजाक कलंक मेटब

छल अभीष्ट

से भेल सिद्ध

सीते! कएलहुॅं मुक्त पत्नीधर्म सॅं।

तथापि लंका- विजयक उपरांत जन-मानस में बसल स्त्री -विरोधी -मानसिकताक तुष्टिक लेल आ  रामक निष्कलंक छवि केॅं  सुरक्षित रखबा लेल सानंद अग्नि में पैसि  गेलीह आ अपन सच्चरित्रता प्रमाणित कयलनि।  अग्नि- परीक्षा मे तपिक’ कुन्दन भेल हुनक शील, किन्तु किछु दिन सुख नञि,सुखाभास!फेर निर्मम परित्याग! किन्तु लव-कुश सन बालकद्वयक वीरता देखि,मुनि वाल्मीकि सॅं हुनक परिचय पाबि अपन उत्तराधिकारीक स्वीकृति मे कोनो संशय नहिं, किन्तु,सीताक स्वीकृति लेल पुनः शर्त-

राम-“कने बाजि दियौ अवध केर निर्मम जन केर सोझाॅं

अहाॅ छी निर्दोष जनकनन्दिनी ,चलू”

हुनक मौनक उपरांत फेर प्रश्न-

“कने थम्हू,एकबेर फेर कहू

अहाॅं आद्यन्त पवित्र छी”

तखन अबैत अछि सोझां ऊपर सॅं कोमल किन्तु मजगूत सीताक असल रूप-

वज्रादपि कठोराणि मृदूनि कुसुमादपि

लोकोत्तराणां चेतांसि को नु विज्ञातुमर्हति।।

ओ कहैत छथि-

“हम छी सशक्त स्वयंपूर्ण सीता

बसल वाल्मीकिक आश्रम मे।”

अहाॅं ओझरायल छी

अमतीक झाड़ मे प्राण

गड़ैत अछि कांट

अनेकानेक हीन-भावना केर

अधैर्यक

संशयक आ अंततः

अस्तित्वक राजा राम!

आइ हम करैत छी मुक्त

बिलाइत छी माटि मे

हिलकोरैत जल मे

लहकैत आगि मे

पसरैत नभ-आंगन मे।

जाउ प्रिय

लए जाउ लदबद

फलित गाछ

बीज जे देने छलहुॅं

घुराओल हे बीजी पुरुष!

स्त्रीक स्वभाव मे ग्रहण नञि,अर्पण होइत छैक।एहि मनोभाव केॅं बहुत नीक जकाॅं रूपायित कएने छथि कवयित्री।

एकठाम ओ “पुरुष- अहम्” के सेहो इंगित करबाबैत छथिन सीताक मुख सॅं सहस्रबाहुक प्रसंग मे-

पलक मूनथि त’ सोझाॅं आबनि कालीरूप

कोना कटत दिवा- रात्रि

दाम्पत्यक स्वाद हरि लेल सहस्रबाहु- वध!

एत’ सद्य: मोन पड़ि जाइत अछि महाकवि जयशंकर प्रसादक कामायनीक ई अंश-

यह जलन नहीं सह सकता मैं चाहिए मुझे मेरा ममत्व

इस पंचभूत की रचना में, मैं रमण करूं पर एक तत्व।।

महनीया कवयित्री मात्र सीताक अथवा उर्मिलाक नहिं, अपितु भरतपत्नी मांडवीक सशक्त  चरित्रक झांकी सेहो देखबैत छथिन,जे राजभवनक कूटनीति आ स्वार्थपरता सॅं विकल भेल छथि-

“हमरो संगे नेने चलू बहिन दाइ

की राखल छैक एहि महल अटारी मे

चेथरी-चेथरी करैत लोक-बरियारी मे।”

कवयित्री अयोनिजा सीता केॅं, सैकड़ों सूर्यक आभा सॅं दीप्तिमती सीता केॅं, शिवक धनुष केॅं बामा हाथ सॅं सरलतया उठा लेबाक अप्रतिम शक्ति सं संयुक्ता जानकी केॅं,भरल सभा मे रामराज्यक तथाकथित मर्यादाक सत्य सभहक सोझाॅं निर्भीक स्वर मे उपस्थित कर’ बाली वैदेहीकेॅं, साक्षात् शक्ति,साकार शील आ सहिष्णुताक त्रिवेणी  सीता केॅं आजुक स्त्रीक स्वर बना प्रस्तुत करबाक स्तुत्य प्रयास कएने छथि।

समग्र विषय- प्रस्तुति मे मैथिलीक टिपिकल शब्दक सोहाओन प्रयोग आह्लादित करैत अछि,कतौ-कतौ कोश देखबा लेल सेहो विवश करैत अछि। जॅं शैलीक गप करी त’ लेखिकाक शब्द मे ई कथा-काव्य थिक, किन्तु कएक ठाम एकर सहज सरल उद्दाम प्रवाह वेगवती धारा जकाॅं देखाइत अछि, आनठाम कथानक रुचिकर शब्द-संयोजनक संग आगां बढ़ैत अछि।

एकटा प्रश्न अवश्य अछि- भूमिका मे लेखिका स्वयं एकरा कथाकाव्य कहैत छथि, मुदा अंतिम पृष्ठ पर गद्यात्मक खण्ड काव्य लिखल अछि।जीवनक कोनो घटना विशेष पर आधारित प्रबन्धात्मक काव्य खण्डकाव्य कहबैछ। साहित्य दर्पण  मे एकर परिभाषा दैत आचार्य विश्वनाथ कहैत छथि-

भाषा- विभाषा नियमात् काव्यं सर्गसमुत्थितम्।

एकार्थप्रवणै: पद्यै: संधि-सामग्र्यवर्जितम्।

खंड काव्यं भवेत् काव्यस्यैक देशानुसारि च।

एहि परिभाषाक अनुसार सर्गबद्ध एवं एक कथाक निरूपक एहन पद्यात्मक ग्रंथ जाहि मे सभ  संधि नञि हो ,जकर कथानक मे एकात्मक अन्विति हो, कथा मे एकदेशीयता हो, कथाविन्यास- क्रम मे आरंभ, विकास, चरम सीमा आ निश्चित उद्देश्य मे परिणति हो आ ओ आकार मे लघु हो, ओ खंडकाव्य थिक।

सर्गबद्धताक अभाव मे की एहि काव्य केॅं खण्ड- काव्य कहबै? एहि पर जॅं विमर्श होमए आ मैथिली काव्यक भेदादि  लेल किछु भिन्न आधार सर्वसम्मति सॅं निर्धारित हो त’ भविष्यक लेखक लेल स्पष्ट दिशा भेटतै।

अंत मे, स्त्री-अस्मिताक स्वस्थ- मुखर पोषिका लेखिकाक चरणवन्दन संग भूरिश: अभिनन्दन।

” वाक्यं रसात्मकम्   काव्यम्” अर्थात् रसयुक्त वाक्य  काव्य कहबैछ। काव्य सुनला वा पढ़ला सॅं जे अलौकिक आनन्द प्राप्त होइत छैक, ओ काव्य मे रस मानल जाइत छैक। रसक  शाब्दिक अर्थ होइछ – आनन्द।

रस अन्त:करणक ओ शक्ति थिक जाहि सॅं मनुक्खक इन्द्रिय अपन कार्य करैछ, मोन कल्पना करैछ, ब्रह्मास्वादसहोदर आनंदक अनुभव करैछ, संसारक सभ मायाजाल सॅं मुक्त भए काव्यक भावभूमि मे जिबैछ,पात्रक सुख सॅं सुखी आओर ओकर दु:ख सॅं दुःखी होइछ।  ई रस नौ प्रकारक होइत अछि,जाहि मे शृंगार केॅं रसराजक उपाधि देल गेल अछि। संयोग आ विप्लम्भक रूप मे एकर दू भेद होइछ।

एहि आलोक मे आइ गप करबाक अछि शृंगाररसक विलक्षण अभिव्यक्ति-क्षमता सॅं संपन्न ऊर्जस्वित कवयित्री श्रीमती जयन्ती कुमारीक प्रथम मैथिली काव्य- संग्रह “अभिसारिका” पर। अभिसारिका ओ स्त्री कहल जाइत अछि जे स्वयं अपन प्रियकेॅं मिलनक उद्देश्य सॅं संकेतस्थल पर बजबैत अछि वा ओकरा लग जाइत अछि ।

“अभिसारयते कान्तं या मन्मथवशंवदा ।

स्वयं वाभिसरत्येषा धीरैरुक्ताभिसारिका।।”

ठाढ़ि तटिनी तीर कामिनि

चकित चित्त चकुआयल मानिनि

जानि कत घनश्याम बिलमल

भेल मोन उचाट,हरि हो!

पलटि हेरथि बाट!

अलंकार- उपयोग सॅं कहियो

 देह अलंकृत होइत अगर

रान्हि-पका कविता खेला सॅं

 भरैत यदि परिवार- उदर।

हमहूॅं तखन काव्य- धारा मे

कवि संग हेलैत रहितहुॅं।

 स’ख- मनोरथ नहिॅं करितहुॅं बरु

 मंचे- मंच बुलैत रहितहुॅं।

“काश अपना एक छोटा सा घर होता और उसमें बाथरूम भी होता।”

काया सुगढ़ काया भेलै जर्जर

अभरलै अस्थि आ पंजर

नयन भेल क्षीण ज्योति सॅं

 श्रवण सेहो भेलै कमतर।।

जरा सॅं ग्रस्त दूनू छी

मुदा हमरा कहाॅं पलखति

जे सोची मुंह लटकौने

जीवन की थिक,मरण की थिक?

जौं चित्त अशांत त’ लिखलहुॅं जे

बनल ओ विद्रोहक नव गीत

ओह! इहो भाव ने भावल ककरो

 रुष्ट भेल सब हीत ओ मीत

आब अहीं कहू हम की लिखी?

  नारिक मोन, जनु करुणाक धार

 बहबैत चलैछ करुणा अजस्र

बिनु कएने फराक,अपन परार।।

नारिक मोन, जनु दयाक खान

हरैछ आधि- व्याधि सब किछु

नहिॅं चाह करै मिसिया प्रतिदान ।।

 कायर बैसय भाग्य भरोसे

कर्मक पथ पर चलैये वीर

 पाछु ने ताकय घुरिक’ कखनो,

कतबो पीठ पर लागय तीर

हाथ विजय केर माल भविष्यक

 डेग कियै नहिॅं उठा रहल छी

 भेटल मानुख- जन्म किएक फेर

 काहि कटने जा रहल छी ।।

 घन छूबै लेल मन व्याकुल अछि

क्षितिज चुमै लेल मन आकुल अछि

खगकेॅं आइ खिहारि  मिलक’

 लोल सॅं लोल लड़ेबै बहिना ।।

धीरे-धीरे पसरल सगरो बड़वानल सम द्वेषक आगि

 देखि तमाशा थोपड़ि पाड़य, अपनहु कहियो जरतै लोक।

 खसला पर हंसिते छै दुनिया, तक्कर नहिॅं कनियो परवाह

 की कहियो एहनो दिन औतय, खसिते बांहि पकड़तै लोक।।

“हुनक सुगंध सॅं मातल तन-मन

सुधि-बुधि गेल हेराइ

खन कोनटा सॅं हुलकि निहारी

खन रही घोघ नुकाइ

पहु दरस भेल,नयन सफल भेल

उर नहिॅं हरष समाइ हे

पाहुन आयल आइ।”