कोनहु स्त्रीक मोन अपन परिवेश सं आत्मिक रूपें सहज सम्बद्ध भ जाइत अछि। एहन स्त्री जखन अपन मनोभावकें लेखनीबद्ध करय चाहय छथि तखन, ई सम्बद्धता सेहो ओहि सृजनमे अभरैत रहैत अछि। एहने सन सृजनक उत्कृष्ट नमूना अछि आदरणीया मेनका मल्लिक जीक पोथी  गेल्ह सब झाडैत अछि पाँखि कविताक संग्रह ।

एहि पोथीमे कवयित्री अपन 49 गोट कविता केँ क्रमशः  तीन खंड ( समाज ,स्त्री आ प्रेम ) मे बाटैत छथिन। पूरा पोथी मे मुख्यतः तीनटा विषय-वस्तु देखार पड़ैत अछि : 1. स्त्री मोनक भाव, 2. प्रकृतिक चिंता आ 3. परम्परामे विचलन।

पोथीक पहिल कविता हरसट्ठे परम्परा सबमे विचलन दिशि संकेत करैत अछि, आ एहि विचलन सभक मध्य पारस्परिक अपनत्व केर उपस्थिति केँ रेखांकित करैत अछि। ई संयोग कहि जे पहिल कविता जत गामक लोक सबहक बीच अपनत्वक बचल अस्तित्व केर साक्षी बनैत अछि ओतहि अंतिम कविता एकटा दंपतिक बीच दूरी आ तकनीकी युग मे प्रत्यक्ष संवादक अभाव केँ रेखांकित क रहल अछि।

हिनक बहुतायत कविता समाजमे,परम्परामे बात-विचार व रहन-सहनमे परिवर्तन केँ रेखांकित करैत अछि  एहि परिवर्तन केँ व्यक्त करैत कखनों कवयित्री पुरान स्मृति मे हरा जायत छथि ते कखनों हेरायल – भूतयायल परम्परा आ भाव सभक विस्मृति मे विवश बुझा रहल छथि. हरसट्ठे कविता मे विस्मृत परम्परा आ परिवेश सँ निकलैत स्मृति सब मे बसल अपनत्व  पर अबैत छथि, कवियित्रीक प्रकृति प्रेम सेहो एहि कविता मे खूब झलकैत अछि:

“धात्रिक फूल पीपड़क गाछ

सह-सह लुधकल जिलेबी

आ गम-गम गमकैत आम

घोघ वाली कनिया”

ई सब कविता विस्तृत परिवेश कें इंगित करैत छैक। परिवर्तन कविता परिवेशक परिवर्तनक संग-संग ब्याहुता स्त्रीक सोहाग चिन्ह मे परिवर्तन तक संकेत करैत अछि।

सुन्नर लगैत अछि गाम कविता मे गामक शहरीकरण आ गामक महिला सबहक जीवन शैली मे शहरीपना देखबैत अछि, एहि कविता मे जतय नव सँ पुरान स्त्रीधरि मधुबनी पेंटिंग सिखबाक ललक अभिव्यक्त कएल गेल अछि ओतहि ब्यूटी पार्लरक आगमन,तेतरीक स्कूटी आदि नव व्यवहार सब सेहो देखार भ रहल अछि।

उदास अछि नेना सब कविता लाल कक्का केर पीपड़ गाछ सँ वा कहि जे प्रकृति सँ लगाव केँ चित्रित करैत अछि, आ गाछ कटला सँ हुनक बेहाल स्थिति केर वर्णन करैत अछि।

एहन नहि जे परिवर्तन खाली नकारात्मक रुपे चिन्हित कएल गेल अछि, मिनी मिथिला कवितामे सोनकाकी बॉम्बे जा क  परिवर्तनक चक्र उनटा घुमाबैत अछि आ हरजोत भौजी, हसीना बहिन , शारदा दीदी, जेसिका काकी आदि सबकें संग क विद्यापतिक गीत पर भास सजाबैत छथि।

कविता डाकपीन कविता मात्र डाकपीनक कार्यशैली मे परिवर्तन के देखार नहि करैत अछि अपितु संवादहीनता सेहो रेखांकित करैत अछि एहि कविताक मार्मिक पाँति अछि :

“टुटैत गेल परिवार

छूटैत गेल गाम घर

बिला गेल पोस्टकार्ड अन्तर्देशी

सिसकैत अछि आखड़

साइकिल वला डाकपीनक संग

पोस्टकार्ड अन्तर्देशी

अबिते नहि हेतैक

अबिते नहि हेतैक

साधारण डाक

से मोन नहि मानय अय”

गंगाक कछेड़ मे ठाढ पुनीता लोकक श्रद्धा मे बदलाव संग बहुत रास समयोचित प्रश्न केँ रेखांकित करैत अछि ते हम मुमताज प्रेमक बदलल स्वरूप केँ, जतय कवियत्री कहैत छथि:

“आय फैक्ट्रीक मशीन मे

ओझरायल अछि शाहजहाँ

भानस घर रासायन

परिवारक भूगोल

आ नेना सबहक व्याकरण मे

अफस्यात अछि मुमताज

तैयो मशीनी दुनियाँ सँ

फराक होयते

घड़ीक टिक टिक

ध्वनीक संग

चलैत रहैछ जिनगी”

जतय तक नारी-जीवनक सवाल अछि कवियत्री स्त्री सबहक दुर्दशा तं रेखांकित करबे करैत छथि, संगहि स्त्री समाजक सबल पक्ष केँ सेहो मजगूती सँ रेखांकित करैत छथि। खंड दूक पहिल कविता अजन्मीक बयान कविता मे गर्भस्थ धिया शिकायत नहि करैत छथि बल्कि सफलताक शिखर पर पहुंचल ई महिला सबहक उदाहरण द अपना केँ ओहि पाँति मे जोड़  चाहैत छथि।

सात समंदर हेलय वाली पहील महिला आ अर्जुन  अवार्ड सँ सम्मानित पद्मश्री बुला चौधरी केर उदाहरण हो वा अंतरिक्ष मे पताका लहराबै वाली कल्पना चौधरीक अथवा सेवा मूर्ति मदर टेरेसाक उदाहरण हो, कवयित्री स्त्रीक मजगूत पक्ष मजगूती सँ रखैत छथि। तहिना तस्लीमा नसरीन केँ समर्पित कविता मे कवियत्री कहैत छथि :

“दीनक ईजोत मे

कारी स्याह नेने

उज्जर पोशाक पहिर

रातुक अन्हार मे

घूम बलाक विरुद्ध

कारी पोतनिहारक विरुद्ध

लिखब अंत धरि

अहाँ कहने रही

आ सेहो अहाँ लिखलौ

दालि दरड़लौ

कतेक छाती पर “

पोथीक खंड दू पूर्णतः स्त्रीकेँ समर्पित खंड अछि आ एकरा अतिरिक्त आन कविता सब मे सेहो स्त्री जीवनक विविध पक्ष चिन्हित कएल गेल अछि। एहि मे स्त्रीक विवशता, भेद-भाव , ममत्व सब पक्ष समेटल अछि।  गोविन्दपुर वाली कविता मे गोविन्दपुर वाली अपन मजबूरी व्यक्त करैत रहैत छैक :

“सब जुग उन्टे चलब करै छै

केतनो भारी उठबियौ

केतनो ईमानदारी सँ काज करियै

बोएन तें मरदाबा सँ

कम्मे भेटतै ।

प्रकृति सेहो हिनक कविता सबमे कोनो नै कोनो रस्ते जगह बनेबाक प्रयास करैत अछि। गुलदस्ता आ केक्टस हो वा चिडैक भावना, उदास अछि नेना सब, हो वा गाछक व्यथा कथा अथवा बाट, ई कविता सब प्रकृतिक विविध रूप चित्रित करैत अछि।

काठ चिड़ैत बालेसर आ दीना मांझी कविता व्यक्तिक जिजीविषा केँ दर्शाबैत अछि ते ओतहि समदाउन कविता नवतुरियाक जिद्द केर आँगा बुढ़ पुरानक जिजीविषा केँ विवश भ पराजित होयत देखबैत अछि। जाहि कविता सँ कविता संग्रहक शीर्षक बनल अछि गेल्ह सब झाडैत अछि पांखि कविता चिरै – चुनमुनीक बच्चा सबहक उत्कट जिजीविषा आ शीघ्र आत्मनिर्भर हेबाक ओकर इच्छाक चित्रण करैत अछि ।

पोथीक सभसं पैघ विशेषता अछि जे कवयित्री मुख्यतया संवाद शैलीमे कविता सभ प्रस्तुत कय रहल छथि। कविता मे कखनो कविताक पात्र सभ परस्पर संवाद करैत छथि तं कखनो लेखिका स्वयं पात्र सँ संवाद करैत छथिन। जेना उफांटि कविता मे माय-बेटा के बीच सम्वाद देखाड़ परैत अछि, ते परिवर्तन कविता मे कवयित्री स्त्रीगन सँ प्रश्न करैत छथि :

“मुदा ई की भेल सखी ?

सोहागक चेन्ह

लाल टुह टुह सिनुरक रंग

किएक बदलि गेल ।”

तहिना गाछक व्यथा-कथा कविता मे बांस आ जामुन परस्पर संवाद क एक दोसराक दुख दर्द सुनैत छथि त महानगर कविता मे घर सँ बतियाइत कवयित्री कहैत छथि :

“साँचे कहैत छियह

हे हमर प्रिय घर”

ओ फूलक गाछ कविता मे फूलक गाछ स्वयं अभिव्यक्ति क रहल अछि जेना कि ओ कवयित्री सँ कहैत होय

“हमरा चाही मात्र

बित भरि जग्गह

गमलों मे क सकैत छह ठाढ़

मुदा, माटि त चाहबे करी

बिनु माटिक किछु नहि

नै तों आ नै हम”

तहिना गंगाक कछेड़ मे ठाढ़ पुनिता कविता मे मुख्य पात्र पुनिता जखन गंगाक दशा देख व्यथित होइत छथि त ओ प्रश्न करबाक बहन्ने स्वयं सँ  बतियाइत छथि। संगहि पुनीता ग्राम देवता लोरिक-सलहेश आदिक बहन्ने जे प्रश्न करैत छथि ओ प्रश्न सब सम्पूर्ण समाजक लेल प्रासंगिक अछि:

“मुदा,फरवरियेसँ चिंतित अछि पुनीता

गंगा सूखि गेलीह एखने

धार सहटि कs चलि गेल बीचोबीच

स्नानक लेल जाय पड़ैत छैक बहुत दूर

अधजरुआ छताइत रहैत छैक”

कविता संग्रहक शीर्षक गेल्ह सब झाडैत अछि पाँखि स्वयं फराक संदेश दैत अछि जे किछ हेरायल भुतयायल शब्द सब एहि पोथी मे भेटत। गेल्ह शब्द एहने एकटा हेरायल वा कम प्रयोग वला शब्द अछि,तहिना पहिल कविता मे बेर बेर आयल शब्द ‘हरसट्ठे’ , तेसर कविता शीर्षक ‘उफाँटि’, आगु चलिक पिता कवितामे शब्द ‘कुचरबब’, तहिना ‘जबदाह मौसम’ ‘मरजाद’, ‘साँकड़’, ‘नैना-जोगिन’ आदि एहन शब्द सब एहि पोथीमे भेटैत अछि जे सामान्य बोलचाल सं प्राय: बाहर भ गेल अछि।

साहित्यमे प्रेम वा श्रृंगार एकटा प्रमुख विषय वस्तु अछि। प्रस्तुत पोथीमे सेहो कवयित्री अंतिम भागमे स्त्री-पुरुष केर परस्पर प्रेम, विरह आदि भाव सभकें व्यक्त क रहल छथि मुदा सबसँ मार्मिक प्रस्तुति अछि प्रेमक सबसँ व्यापक स्वरुप अर्थात् संतानक प्रति माताक प्रेम केर। गेल्ह सब झाडैत अछि पाँखि कविता एहि प्रेमक बखान बखूबी क रहल अछि।

संक्षेप मे कही त, व्यापक परिवेशमे ई पोथी प्रकृति, परम्परा, प्रेम, करुणा इत्यादि सं सराबोर कविता सभमे पाठक कें डुबकी लगेबाक अवसर दैत अछि। शिल्पक स्तज पर बंधनमुक्तता एकरा विशेष बनबैत अछि। किछेक कविता अपन कथ्य कें स्पष्ट रूपें कहबा स पहिने ख़तम भ रहल अछि मुदा समग्रतामे ई पोथी रोचक अछि।