सब धिया पुता खैले छै, लेकिन सुहानी त कहौं देखाइ नै द रहल छै। कतैक देर भ गेलै। एखन धरि त आबि जाइत रहय। सब ठीक त छै ने? कहीं मन त नै खराब भ गेलै? हम अप्पन बहिनपा सुधा से पुछलौ।

जा! अहाँ नै जनै छियै की?

की? कोनो विशेष बात भे गेल की? हम कनका डरि क पुछलौं।

विशेष कहय छी? सुहानी दायक माय-बाबूजीक त संसारे उजड़ गेलइ। एकहिटा बेटी छलै, सेहो पागल भ गेलय। कालहिये त ओकरा पागलखाना छोड़ि क सब गोटा अयला हन। मातम पसरल छै हुनका घरे।

ई की कहै छी अहाँ? हम अचरज स पूछलौ। अहाँ हमरा पूरा बात बताउ। कि सब भेल छलई?

अहाँ कें सच्चे किछ नै मालूम? सुधा हमरा से पुछली।

नै.. हम किछ दिन गाम स बाहर छलियै न, ताहि स। अब बताबू न। हम्मर मन कोना कोना ने भ रहल। सुधा अप्पन अचरा से नोर पोछैत बोललखिन “एतैक सुनर दाय छल पता नै केकर नजर लागि गेलई.. कोन भूत चढ़ि गेलय.. आ की कोनो डायनक भेट चढ़ गेलय.. किछु दिन से अजबे करैत रहय। केकरो स न बोलनाइ, न किछ। बड़ दिन स खेलतो नै छल। कोनो काज नै.. केकरो स मतलब नै.. बस दिन भर माटी स पता नै की बनाबैत रहय.. आ खुबे बतियाय। फेर कखनौ हसय, त कखनौ खूबे कानय। ओकर माय-बाबूजी त मारिते पूजा पाठ कैलखिन.. झारो फुक करैलखिन लेकिन कोनो असर नै भेलै।

त.. डॉक्टर से नै देखेलखिन की? हम बिचेमे पूछि देलौं।

डॉक्टरो के देखलखिन। मारे सुइया-दवाई परलै। पैसा त पानि जेका बहा देलखीन लेकिन किछू नै भेल। सुहानीकमाय-बाबू के देखब त चिन्हाय नै छै। अच्छा.. अब हम चलय छी, सांझ बत्ती देबे के छै।

सुधा त चलि गेल। एन्ने हमर मनमे पहिले के बात सब घूमय लगलै। रातिमे नीन्नो नै भेलय। भिंसर होयत होयते हम पक्का मन बना लेलू जे आइ त सुहानीक माय-बाबूजी से बात करय के छै। एना ककरो जीनगी मज़ाक थोड़े छै। हम कुछ करि सकै छिये, त करयमे की हरज़ छै। घर के काज निपटा क हम चलि देलौ सुहानीक घरे।

ओतय त सन्नाटा छलइ, तखनो हिम्मत क क घुसि गेलौं। भीतर एकदम अन्हार छलै। के???  सुहानीक बाबूजीक आवाज़ छल। भाइजी, हम छी। अच्छा दुलहिन.. आबू। ई कहैत सुहानीक बाबूजी लाइट जरा देलखिन। कोठरीमे इंजोर भ गेलई।

दीदी कत छथिन? जवाब में पलंग दिश इशारा क भाइजी घर स बाहर निकाल गेलखीन। दीदी हम गोर दबैत बोललौं। के? दुलहीन अहाँ? कत चल गेलिए? देखू न कि भ गेल? अहाँक बेटी त..  एतना कहैत कहैत दीदी फूटि-फूटि क कानय लगलखिन।

अहाँ नइ कानू, सब ठीक भ जायत। अहाँ धीरज धरू। हम हुनका समझा बुझा क कनका पानी पियेली। तखन ओ कनका स्थिर भेलखिन। फेर कहय लगालखिन.. “हे दुलहीन, अहाँ ठीक कहा छलिए मगर हम सब अहाँक बातक मज़ाक उड़ा देलियै। अब देखू की स की भ गेलय।“

“अखनो कुछ नै बिगरलइ हन दीदी।”

सच्चे दुलहिन?? ह्ममर बात सुनि सुहानीक मायक आंख चमकि उठल।

हे यौ! अहाँ सुनए छियै? सुहानीक बाबूजी!

हं, सुनलौ ये सुहानीक माय! भाइजी जे दोसर कोठारीमे सब बात सुनय छलखिन, बोलि उठला “अब अहें बताबु दूलहीन की करे के चाही।“

हमरा विचार स त पहिले त काल्हिये चलू अस्पताल, जहां दाय भर्ती अछि।

“ओ पागलखाना??” दीदी पुछलखिन।

नै नै दीदी.. ई सोच त बदलय परत। ऊहो हस्पताल होए छै।

“ठीक छै जेना अहाँ कहू। अहाँ चलब न संगे?” भाइजी पुछला।

“हां-हां, किएक नै।” सब तैयारी करि के हम सुहानीक माय-बाबूजी संगे मानसिक चिकित्सालय पहुंचलौ। ओतय डाक्टरनी स बात करय पर पता चलल जे सब रिपोर्ट ठीक छै, घर ले जाय के परमिशन भेट गेलय। लेकिन भाइजी कनका हिचकिचाय लगला।

की भेल भाइजी?

“नै दुल्हिन दाय के ल त जेबय लेकिन गोतिया आ गाम के लोक सब की कहत?”

भाइजी! त बेटी के जिनगी भरि एतय छोड़ देबय? मरय लेल? अप्पन सबक देहमे बेमारी होय छै, त की ओतय हस्पतालमे छोड़ दय छी की? नै न? त फेर? एहो त एकटा रोगे छै ने। जखन छुट्टी भेट गेल, त आब कोन परेशानी?

“गामक लोक सब दाय के पागले बुझई छै ने। कतेक शौख छल जे बेटीक बियाह बड़ धूम धाम स करब। अब त पूरा जिनगी एकर…” एतना कह के भाइजी कानय लगलखिन।

अहाँक दुख हम बुझैत छी, अहाँ स छोट त छि लेकिन एकटा बात अहाँ कें कहब जे अहाँ  यदि चाहय छी जे दायक जिनगी सुन्नर बनय त अहाँ कें मजगूत बनय पड़त। अहाँ ढाल बनू ने। आ. अहाँ कोनो गलत काज त नै क रहल छी ने। बात ई नै छी जे दाय बीमार पड़ल, मुदा ई छै जे हुनकर पूरा इलाज कोना होयत।

“बीमार नै न दूलहिन.. पागल..” दीदी हमरा बुझाबैत बोलली।

नै ये दीदी! इहो बेमारी छै। जेना टीबी होय छय, टायफायड होइ छै, इलाजक बाद त सब ठीक भ जाय छै ने। अंतर एतने छै जे ओ सब देहक बेमारी छै आ ई मनक बेमारी।

“तखन की? जिनगी भरि दाय पागल नै रहत।“

नै भाइजी! कनका देखभाल के जरूरत छै बस। आ ककरो त आगू आबय पड़ते ने। तें आहिं आबू ने। आ.. रहल बियाहक बात.. त ओयमे बहहुते समय छै। पहिले दायक देखभाल करू। पूरा ठीक भ जाए, तखन पढ़ाबू, काबिल बनाबू। रिश्ता अपने चलि के आओत।

“अहाँ ठीक कहलौं दुल्हीन, अब त हम सुहानी के खूब पढेबइ और डॉक्टर बनेबय, सेहो, दिमागक डाक्टर।“